Bli med Fredrik Høyer inn i ein humoristisk og gjenkjenneleg skulekvardag, som me alle har eit forhold til. 
I friminuttet byr me på kaffi og vaflar til alle!

Eg ventar til det blir stille…
Å vere lærar er som å vere standup-komikar, psykolog, barneoppdragar og foredragshaldar på same tid. Alt skal lærast, ikkje minst kjærleiken ein får til elevane. Viss læring er å møte seg sjølv, og forståing er å stå framfor eit anna menneske, kva betyr då eigentleg ansvar for eiga læring?

Den nytilsette vikarlæraren Kristian står framfor ein femteklasse, eit tverrsnitt av samfunnet, fylt med behov, forventingar og draumar. Men hemmeleg går han rundt med ei konstant indre oppløysing. I møte med tiåringane blir han nøydd til å konfrontere sitt eige indre barn, lærarrolla og systemet rundt han.

Slam-poet og skodespelar Fredrik Høyer er ein av dei mest originale stemmene i samtidsteateret. Han framfører sjølv rolla som vikarlæraren Kristian med nærleik og sylskarp humor, i ei djuptloddande tekst om korleis me forstår oss sjølve gjennom andre sine blikk og rollene me spelar i liva til kvarandre. På ein overraskande måte blir det grå og kvardagslege gjort til ei mytisk reise som vedkjem både deg og meg. 

Framsyninga varar i to dobbelttimar (inkludert friminutt). I pausen inviterer me til friminutt – ein sjanse til å fylle kaffikoppen og få seg ein nysteikt vaffel før det ringer inn.