Gunnar Idenstam (fødd i Kiruna 1961) er konsertorganist, komponist og folkemusikar.
I 1984 vann han den prestisjefylte improvisasjonskonkurransen Grand Prix de Chartres, og sidan har han spelt konsertar i heile verda.
Som utøvar er han skulert i den franske tradisjonen, mellom anna av den legendariske orgellæraren Marie-Claire Alain, og han har ein forkjærleik for Bach og Dupré.
Som komponist har han sin eigen stil, ei syntese av kunstmusikk, symfonisk rock/ pop og folkemusikk.
Som arrangør gjenskapar han alle fargane frå symfoniorkesteret på orgelet, til dømes i transkripsjonar av Mahler og Ravel sin orkestermusikk.
Som folkemusikar transkriberer han idioma til svensk folkemusikk for kyrkjeorgel, harmonium eller synthesizer.

Under seminaret "Kved opp! Om folkemusikk i kyrkja" på Ål den 23.-24. september ligg det an til ei forrykande oppleving når Idenstam slår seg laus på Ål kyrkje sitt barokkinspirerte Kaliff-orgel tysdagskvelden.